عمت عيني عليج عيون بغداد

عمت عيني عليج عيون بغداد
خلص عمرج عذاب ودمعه مهموره
حزينه ومافرحتي بيوم يبلاد
بس هم وحزن وكلوب مكسوره
عمت عيني اعله دجله الماغفه ولاهاد
الا عله الجثث عالجرف منثوره
عمت عيني عليج عيون بغداد
كل ضالم يمر يشوه الصوره
يمر بيج ويلون ارضج دموم
واطفالج تنام الليل مذعوره
ونستهم قنابل والصواريخ
وساعات الفرح من اهلي محضوره
مانعرف ذنبنه والجنيناه ؟؟؟!!!
ليش الدار مضلم وانهدم سوره ؟!!
حزينه بيوتنا وتبجي الدرابين
والجيران وسفه بحزني مسروره !!
نخيت الجار كلهم والمسلمين
وحشمت العرب واليعرف الجوره
نريد العونه منكم كافي جم دوب
ليش دمومنه بهالرخص مهدوره
نريد العونه منكم يالسلاطين
ومااكدر ازيد الكاع محضوره !!!
*****
، بغداد ،
متأذين احنه ونجي كل يوم
وكل لحضه التمر ننزف عليج دموم
صمنه من الفرح صارلنه حفنه سنين
هم شفتو بشر كضه العمر بس صوم !!
لامرت بيحيى !!
ولانبي ايوب !!
لامر بيها يونس لانبي يعقوب

خلصنه العمر دمعه وحزن وهموم !!!
يابغداد يابغداد يابغداد
ملينه وحياتج مر الفراك
حنظل من نضوكه وطعمه مسموم
بغداد وحياتج مانسيناج
جرحج بالكلب يحبيبه مضموم
فتحنه كلوبنه وكل القرآئين
ودعينالج ينجمه وتسوه النجوم
دعينه الغمّه عنج تنمحي بساع
ونلبسج من جلدنه احلى الهدوم
انتي امنه وابونه وانتي الولاد
وانتي الفوك دومج علو النجوم
يبغداد الوكت سوانه طشار !!
حسافه الزين بينه يصير مهزوم
رهننه كلوبنه وبعنه الشرايين
وشرينه بدالهن انواع الهموم !!!!